MWANDISHI WA DAILY MAIL ASHITUSHWA NA ULINZI WA GHALA LA KUHIFADHIA MENO YA TEMBO

 

Mwandishi wa gazeti la Daily Mail  la Uingereza, Martin Fletcher akiwa katika chumba cha kuhifadhi meno ya tembo katika Wizara ya Maliasili na Utalii jijini Dar es Salaam ambako zaidi ya meno 34,000 yamehifadhiwa. Picha ya Daily Mail.

Licha ya Rais Jakaya Kikwete kutoa ahadi ya kuteketeza maelfu ya meno ya tembo yaliyo kwenye ghala la Serikali, imeelezwa kuwa uwezekano huo ni mdogo.

Mwandishi wa gazeti la Daily Mail la Uingereza, Martin Fletcher ameeleza kushtushwa na hali ya ulinzi kwenye ghala hilo lililosheheni meno 34,000 ya tembo ambayo kwa biashara ya magendo nchini China yanagharimu Pauni 150 milioni za Kiingereza (Sh403.5 bilioni)

Fletcher, ambaye aliandika habari ya kuhusika kwa wanasiasa na wafanyabiashara wakubwa wa Tanzania katika biashara haramu ya meno hayo kiasi cha kuifanya nchi kuwa muuzaji mkuu wa nyara hizo, aliandika hayo kwenye taarifa kuhusu ziara yake nchini iliyochapishwa na gazeti hilo jana.

Habari ya awali ilitikisa ulimwengu ambao unapambana kulinda viumbe walio hatarini kutoweka ikiwatuhumu wanasiasa na wafanyabiashara wakubwa nchini kuhusika, huku Serikali ikishindwa kuwadhibiti.

Habari hiyo iliifanya Serikali ya Tanzania kufungua milango kwa vyombo vya habari vya nje kuja nchini kupata habari sahihi kuhusu tatizo hilo, akiwamo Fletcher wa Daily Mail.

Katika ziara yake, Fletcher alipata nafasi ya kutembelea ghala la nyara hizo, kuzungumza na maofisa wanyama pori pamoja na Waziri wa Maliasili na Utalii, Lazaro Nyalandu.

“Nyalandu pia aliweka bayana kuwa uteketezaji wa shehena ya Tanzania ni kitu ambacho kiko mbali na uhalisia, licha ya ahadi ya Kikwete jijini London,” Fletcher alimkariri Nyalandu kwenye habari hiyo ambayo imeambatana na picha alizozielezea kuwa za kushtua za ghala hilo, lenye idadi kubwa ya meno ya tembo kuliko maghala yote duniani.

“Alisema Rais alikuwa na nia ya kuteketeza (shehena hiyo), lakini Tanzania ilitaka ilipwe takriban Pauni 30 milioni za Uingereza kutoka Jumuiya ya Kimataifa kwa ajili ya Mfuko wa Hifadhi ya Tembo.”

Hata hivyo mwandishi huyo anaripoti kuwa; “Wahisani ambao wangeweza kutoa fedha hizo, walikejeli kiwango hicho wakisema hakina uhalisia.”

Alipoulizwa kuhusu kauli hiyo jana, Nyalandu alisema baadhi ya mambo kwenye habari ya mwandishi huyo yamekuzwa, lakini alisema uamuzi wa kuteketeza nyara hizo haujafikiwa.

Alisema Serikali ilichofanya hadi sasa ni kupiga marufuku biashara zote za meno ya tembo, hivyo haitauza yaliyopo na haitaomba kibali tena cha kufanya biashara hiyo na kwamba kinachoendelea sasa ni mazungumzo ya namna ya kushughulika na shehena iliyopo.

“Meno mengine yaliyopo ni ya kihistoria. Ni marefu kuliko mengine na tembo wa aina hii hawapo tena, hivyo kuwa nayo pia ni kitu kizuri. Haya meno ni mali ya Watanzania wote, uamuzi wa kuyateketeza lazima uchukuliwe kwa busara,” alisema.

Kwa mujibu wa Fletcher meno mengine yana urefu wa futi 7, uzito wa tani 125 na moja linaweza kubebwa na watu kuanzia watatu, huku jino fupi likiwa na uzito wa kilo 0.4500 na kwa mujibu wa jangili aliyekiri kuua tembo 30 kwa siku, jino hilo dogo liling’olewa kutoka kwa tembo mtoto.

Mara tatu katika kipindi cha miaka minane, Tanzania imeomba bila mafanikio kibali cha kuuza shehena yake kutoka katika nchi 180 zilizosaini makubaliano ya kudhibiti biashara ya kimataifa ya viumbe walio hatarini kutoweka, Cites, licha ya ushahidi mkubwa kuwa kitendo cha kuuza mara moja tu, kitazidisha tamaa ya China kupata meno hayo.

Akizungumzia ziara yake nchini, mwandishi huyo anaelezea udhaifu katika ulinzi wa ghala hilo lililo nyuma ya jengo la Wizara ya Maliasili na Utalii jijini Dar es Salaam.

“Ghala hilo niligundua siyo kama ngome (yenye ulinzi mkali). Lina milango ya chuma ya kusukuma ikiwa na kufuli nzito tano ambazo funguo zake zimegawanywa kwa maboharia wawili, lakini milango ilifunguliwa yote nilipofika,” makala hiyo inaeleza. “Kila jino limewekwa alama na namba na ghala ina kamera za ulinzi wa ndani, lakini sikuona mlinzi mwenye silaha nje.”

Mwandishi huyo anaeleza kuwa habari yake ya kwanza iliyohoji kama mtoto wa Mfalme wa Wales na Waziri Mkuu wanaweza kushikana mkono na Rais Kikwete wakati alipotembelea Uingereza, ilizua kizaazaaa kiasi cha Rais Kikwete kuitisha kikao na maofisa waandamizi wa Maliasili na kutoa maelekezo kuwa wafanye kazi.

Mwandishi huyo alitembelea maghala ya meno ya tembo, Hifadhi ya Selous ambayo mwaka 2006 ilikuwa na tembo 70,000 lakini hadi sasa wamesalia 13,000 tu. Baadhi ya meno yalichukuliwa kutoka tembo waliokufa na mengi kukamatwa kutoka kwa majangili na hayawezi kuuzwa kwa sababu ya biashara hiyo kuzuiwa duniani.

Posted By Unknown02:35

0

Continue Reading

MAHAKAMA NCHINI MISRI IMEWAHUKUMU KIFO WATU 529

Mahakama nchini Misri imewahukumu kifo watu 529 ambao wanasemekana kuwa wafuasi wa Rais aliyeng'olewa mamlakani Mohammed Morsi.

Watu hao walikabiliwa ma mashitika mbali mbali yakiwemo mauaji ya polisi na kuwavamia polisi.

"Wafuasi hao wa chama kilichopigwa marufuku, cha Muslim "

Brotherhood, ni sehemu ya kundi lengine kubwa la watu zaidi ya 1,200 wanaoaminika kuwa wafuasi wa Morsi.

Maafisa wa utawala nchini Misri wamekuwa wakiendesha msako mkubwa dhidi ya wafuasi wa vuguvugu hilo, tangu Morsi kuondolewa mamlakani mwezi Julai mwaka jana.

Maelfu wamekamatwa huku mamia wakiuawa.

Mahakama hiyo ilitoa hukumu baada ya vikao viwili pekee ambapo mawakili wa watuhumiwa walilalamika kuwa hawakupewa muda wa kuwasilisha kesi yao vyema.

Mauaji wanayodaiwa kufanywa na watuhumiwa yalitokea Kusini mwa Misri, mwezi Agosti, baada ya vikosi vya usalama kuvunja kambi mbili za wafuasi wa Morsi waliokuwa wanataka arejeshwe mamlakani.

Posted By Unknown02:01

0

Continue Reading

WALIOPOTELEWA NA NDUGU ZAO KWENYE NDEGE YENYE NAMBA MH370 WAILAUMU SERIKALI

Mwanamke akilia kwa uchungu (hapo pichani) akiondolewa kwa nguvu kwenye mkutano wa waandishi wa habari ambao ulipangwa kufanyika leo mjini Kuala Lumpur.  Mwanamke huyo na baadhi ya ndugu ‘waliopotelewa na ndugu zao’ katika ndege aina ya Boeing 777 namba MH370 iliyopotea zaidi ya siku 10 zilizopita ambao wameilaumu serikali ya Malaysia kwa kutowaambia ukweli na kuwazungusha kuhusu juhudi za kweli kuhusiana na ndugu zao.…

Mmoja wa wanafamilia walipotelewa ndugu akiongea kwauchungu na waandishi wa habari kwenye uwanja wa ndege wa Kuala Lumpur.

Mwanamke akiondolewa na maofisa usalama wakati alipojaribu kulalamika kwenye mkutano wa waandishi wa habari katika hoteli ya Sepang mjini Kuala Lumpur.

Familia ya Wachina waliokuwa na ndugu katika ndege ya Malaysia, wakisindikizwa kutoka kwenye mkutano wa waandishi wa habari.

Moja ya ndege za Jeshi la Maji la Marekani ikitayarishwa kwenda kuisaka ndege ya Malaysia iliyopotea.

Ndege nyingine ya jeshi la Marekani ikisafishwa ili kwenda kuitafuta ndege ya Boeing 777 iliyopotea

 CHANZO: DAILYMAILY

Posted By Unknown06:35

0

Continue Reading

WARIOBA ATEKA BUNGE

Mwenyekiti wa Tume ya Mabadiliko ya Katiba, Jaji Joseph Warioba jana aliliteka Bunge Maalumu la Katiba mjini Dodoma, alipowasilisha Rasimu ya Katiba na kushangiliwa katika maeneo mengi nyeti na kupigiwa kelele katika vipengele vichache vya uraia na ardhi.

Katika hotuba yake ya maneno 14,112 iliyosomwa kwa saa 3:34, Jaji Warioba aliweka wazi maoni ya wananchi yaliyomo katika ibara 271 za Rasimu hiyo, ukiwamo muundo wa Muungano wa Serikali Tatu – Jamhuri ya Muungano, Serikali ya Tanganyika na Serikali ya Zanzibar.

Mwanasheria huyo alijenga hoja zake zilizoisaidia Tume yake kufikia hitimisho la muundo huo, kwamba ilizingatia maoni ya wananchi, yakiwamo ya mabaraza ya katiba ya Ofisi ya Makamu wa Rais, Ofisi ya Waziri Mkuu na Baraza la Wawakilishi Zanzibar ambayo ama moja kwa moja au kwa tafsiri yalipendekeza muundo wa Serikali Tatu.

Alisema tume hiyo ililazimika kupendekeza muundo huo kutokana na kero, hoja na malalamiko yaliyotolewa na pande mbili za Muungano wakati tume hiyo ikukusanya maoni, pamoja na hoja zilizotolewa miaka ya nyuma na tume mbalimbali.

“Suala la muundo wa Serikali Tatu limechukua nafasi kubwa katika mjadala tangu tume ilipozindua Rasimu ya Kwanza ya Katiba. Mjadala wa muundo wa muungano umekuwa mkubwa kiasi cha kufunika mapendekezo mengine yaliyomo katika Rasimu ya Katiba ya Jamhuri ya Muungano,” alisema Warioba katika hotuba yake ya aya 191 ambayo imechapwa kwa ukamilifu ndani ya gazeti hili.

Huku akishangiliwa na baadhi ya wajumbe, Jaji Warioba alisema kwa tahmini ya tume hiyo, muundo wa Serikali mbili hauwezi kubaki kwa hali ya sasa.

“Muungano wa Serikali mbili waliotuachia waasisi siyo uliopo sasa. Umebadilishwa mara nyingi, wakati mwingine bila ya kufanya mabadiliko kwenye Katiba.  Waasisi walituachia Muungano wa nchi moja yenye Serikali mbili na siyo nchi mbili zenye Serikali mbili,” alisema.

Alisema muundo wa Serikali mbili unaweza kubaki tu ikiwa orodha ya mambo ya muungano haitapunguzwa bali itaongezwa na isipokuwa hivyo Serikali ya Muungano itabaki na rasilimali na mambo ya Tanzania Bara tu.

“Katika hali hiyo, pande zote mbili zitaendelea kulalamika. Kwa upande mmoja, Zanzibar itaendelea kulalamika kwamba Tanzania Bara imevaa koti la Muungano kwa faida yake na kwa upande mwingine, Tanzania Bara itaendelea kulalamika kwamba mambo yasiyo ya Muungano ya Tanzania Bara na rasilimali zake, ndizo zimekuwa Muungano,” alisema. 

Warioba alishangiliwa tena na baadhi ya wajumbe aliposema: “Muundo wa Serikali Tatu haupunguzi uimara wa Muungano na muungano huo ni wa nchi mbili kwa manufaa ya wananchi, “Faida kubwa iliyopatikana katika miaka hamsini iliyopita ni kuungana kwa wananchi.”

Waliotoa maoni

Kuhusu idadi ya waliotoa maoni, alisema watu wengi waliotoa maoni kuhusu Muungano walijikita katika muundo wake kama njia ya kuondoa kero,” alisema.

Alifafanua kwamba Tanzania Bara wananchi zaidi ya 39,000 walitoa maoni kuhusu muungano na kati ya hao, 27,000 walizungumzia muundo wake.

Kwa Zanzibar, wananchi karibu wote waliotoa maoni walijikita kwenye suala la Muungano na kwamba kati ya watu 38,000 waliotoa maoni kuhusu Muungano, 19,000 walitoa maoni kuhusu muundo wake.

“Wananchi waliotoa maoni kuhusu muundo wa Muungano kwa upande wa Tanzania Bara, asilimia 13 walipendelea Serikali moja, asilimia 24 Serikali mbili na asilimia 61 waliendekeza Serikali Tatu” alisema na kuongeza;

Utafiti wa Tume

Alisema kuwa baada ya kuchanganua sababu mbalimbali zilizotolewa na makundi mbalimbali tume hiyo ilianza kufanya utafiti wa kina kuhusu muundo wa muungano na matatizo yake tangu ulipoundwa Aprili 26, 1964, na kutaja tume zilizopendekeza Serikiali tatu.

Alizitaja tume ya Jaji Francis Nyalali ya mwaka 1993, kundi la Wabunge 55 kutoka Tanzania Bara (G 55) waliopeleka bungeni hoja ya kuundwa kwa Serikali ya Tanganyika na Tume ya Jaji Kisanga.

Changamoto Serikali Tatu

Kuhusu Serikali Tatu ambao chama tawala (CCM), kimekuwa kinaupinga kwa udi na uvumba, Jaji Warioba alisema muundo huo utakuwa na changamoto zake, ikiwa ni pamoja na kuongezeka kwa gharama ingawa hazitakuwa kubwa kama inavyofikiriwa.

“Gharama kubwa kwa shughuli za Muungano ni katika eneo la ulinzi na usalama, yaani jeshi la wananchi, polisi, usalama wa taifa na mambo ya nje. Gharama hizo hazibadiliki, zinabaki zile zile bila kujali kama ni muundo wa Serikali mbili au Serikali tatu,” alisema.

Alisema tangu Muungano uundwe, Serikali ya Muungano na Serikali ya Zanzibar zimekuwa zikiongeza wizara, mikoa, wilaya na taasisi mbalimbali za kiutawala ili kuleta ufanisi na hivyo kuongeza matumizi ya Serikali.

“Tume imependekeza kodi ya bidhaa iwe ya Muungano, pia mapato yasiyo ya kodi, mikopo na michango ya nchi washirika. Ushuru wa bidhaa utakidhi sehemu kubwa ya gharama za muungano,” alisema na kuongeza:

“Kwa upande wa matatizo ya kiutendaji, tume imependekeza muundo wa Serikali tatu ujengwe kwenye misingi minne ya utendaji – muungano wa hiyari, ushirikiano, mshikamano na kutegemeana.

Kuhusu hati ya Muungano, Warioba alipendekeza iwe ni msingi mkuu wa Jamhuri ya Muungano wa Tanzania.

Kero za Muungano

Jaji Warioba alirejea kauli zake za awali, kuwa katika kipindi chote cha Muungano, kila upande ulikuwa na malalamiko yake kuhusu 

Muungano na kuyataja malalamiko 11 ya Zanzibar yakiwamo;

Serikali ya Tanganyika kuvaa koti la Serikali ya Muungano ambalo linaisaidia Tanganyika zaidi kuliko Zanzibar, mambo ya Muungano kuongezeka na kuvunjwa kwa makubaliano ya Hati ya Muungano.

Kwa upande wa Tanzania Bara alitaja malalamiko 10 yakiwamo Zanzibar kuwa nchi huru yenye bendera yake, ina wimbo wake wa Taifa, ina Serikali yake na imebadili Katiba yake ili kujitambua kuwa ni nchi, Zanzibar kubadili masharti ya Katiba ya Jamhuri ya Muungano na kutunga sheria kuhusu fedha ambalo ni suala lililo kwenye madaraka ya Muungano.

Posted By Unknown06:16

0

Continue Reading

RAIS ZUMA ALIVYOFISADI PESA ZA UMMA

Ripoti iliyosubiriwa kwa hamu kuhusu ufisadi nchini Afrika Kusini, imemkosoa vikali Rais Jacob Zuma kwa kujinufaisha na pesa zilizotumiwa kuikarabati nyumba yake binfasi katika mkoa wa Kwazulu Natal.

Ukarabati huo uligharibu dola milioni 23.

Katika ripoti yake , mdhibiti wa mali ya umma nchini humo,Thuli Madonsela, amesema kuwa Zuma alikiuka sheria za maadili na kujifaidisha na pesa za Umma.

Inaarifiwa Zuma alisisitiza ukarabati huo, ufanywe.

Hata hivyo, ripoti hiyo ilisema kuwa hakudanganya wabunge kuhusu kashfa hiyo. Kadhalika wito umetolewa kuwa Zuma arejeshe sehemu ya pesa hizo ambazo hazikutumika kwa ajili ya usalama wake au vinginevyo.

Vyombo vya habari nchini humo vinadai kuwa baadhi ya pesa za umma zilitumiwa katika kufadhili mahitaji ya kifahari ya bwana Zuma kama bwawa la kuogelea na chumba cha sinema.

Mwandishi wa BBC nchini humo anasema kuwa ripoti hiyo itaathiri pakubwa sifa ya Zuma na chama tawala ANC, huku akijiandaa kwa uchaguzi mkuu katika kipindi cha wiki sita.

Posted By Unknown06:03

0

Continue Reading

JOHARI YUPO MBIONI KUOLEWA

Hayawi hayawi sasa yamekuwa .Hatimaye staa wa filamu za Kibongo, Blandina Chagula ‘Johari’ yuko kwenye mwanga wa maisha ya ndoa kufuatia Kiongozi wa Kundi la Mtanashati, Ostaz Juma Namusoma kuweka wazi uhusiano wao wa kimapenzi huku akisema ana mpango wa kumuoa kabisa,

Staa wa filamu za Kibongo, Blandina Chagula ‘Johar

Hivi karibuni katika mtandao wa kijamii wa Instagram, Ostaz alitumbukiza picha inayomwonesha yeye akiwa katika ‘pozi nono’ na Johari huku akimsifu mwandani wake huyo. Hali hiyo ilisababisha maswali kwa baadhi ya mashabiki wa Johari., wawili hao wako ‘klozidi’ tangu kitambo hasa baada ya penzi bubu la Johari na staa mwenzake wa sinema za Bongo, Vincent Kigosi ‘Ray’ kuparaganyika.

Kwa sasa Ray anadaiwa kutoka kimapenzi na mcheza filamu mwenzake, Chuchu Hans ambapo nao inadaiwa wako katika mikakati ya kufunga ndoa kama si pingu za maisha.

Johari na Ostaz Juma katika picha ya pamoja.

Chanzo chetu kimoja kilisema kuwa, Ostaz amekufa kimapenzi kwa Johari, ‘hakohoi, hanywi maji, halali usingizi’ na yuko tayari kwa ndoa itakayokuwa ya kifahari.
“Ukitazama hapo Johari hana kipingamizi, ingekuwa zamani angesema yuko na Ray kuna kikwazo cha yeye kuolewa na Ostaz, lakini kwa sasa kipi kitamzuia?” chanzo hicho kilipayuka.

MSIKIE OSTAZ
Baada ya kuzinyaka taarifa hizo na picha ya wawili hao kwenye mtandao, mapaparazi wetu walimsaka mwanaume huyo kwa njia ya ujumbe mfupi wa maneno (SMS) kupitia simu yake ya mkononi na mambo yalikuwa hivi:
Risasi Jumamosi: Kaka kuna tetesi kwamba una uhusiano na Johari, unasemaje?
Ostaz: We nani?
Risasi: Mwandishi wa Risasi Jumamosi.
Ostaz: Ndiyo Johari ni wangu na mimi ni wake, tutafunga ndoa watu watashangaa sana.
Risasi Jumamosi: Huoni kama Ray atakukasirikia?
Ostaz: Kwani yeye ndiyo amemzaa Johari?
Risasi Risasi: Lakini kaka wewe mbona umeoa?
Ostaz: Mbona sikuelewi, Muislam mwisho ni wake wangapi?
Risasi Jumamosi: Vipi mkeo karidhia na lini ndoa?
Ostaz: Na Johari anataka kuslimu kuwa Muislam, tumepanga jina, ataitwa Rahma.
Risasi Jumamosi: Jambo jema. Mmeanza lini uhusiano wenu?
Ostaz: Hayo mengine muulize Johari mwenyewe mi nimeshasahau maana nina mambo mengi ya kujenga taifa.
“Lakini mimi nilianza na Johari kabla ya huyo Ray wenu, wakati huo Johari akiwa anaishi Mburahati (Dar), yeye alikuwa anafanyia mazoezi ya kuigiza pale TZF (baa), Kigogo.”
JOHARI SASA
Kutokana maelezo hayo ya Ostaz, Risasi Jumamosi lilimtafuta Johari kwa simu yake ya mkononi na kumuuliza kama kweli yu mapenzini na mfanyabiashara huyo maarufu jijini Dar.
Johari: “Hamna bwana, kama Ostaz mwenyewe ndo’ kasema hivyo huenda alikuwa anatania tu. Kweli hakuna kitu kama hicho, ila ni mtu ambaye nina ukaribu naye mkubwa lakini si mapenzi.
Risasi Jumamosi: Kama ametutania mbona sisi siyo watani wake?
Johari: Mimi sijui sasa, yeye ndiyo anajua.
Risasi Jumamosi: Kama ni hivyo, wewe huoni kwamba utani wake ni mkubwa sana?
Johari: Mimi sijui chochote jamani, muulizeni yeye.
Baada ya kuzungumza na Johari, Risasi Jumamosi lilimgeukia Ostaz na kuulizwa kama kuna utani ndani ya maelezo yake.
“Jamani, ninyi mnachotakiwa kukielewa ni kuwa, Johari ni wangu na mimi ni wake. Siku ya ndoa tutaitangaza, itakuwa ndoa kubwa sana na Johari nitamfanyia mapenzi ambayo hajawahi kufanyiwa tangu azaliwe.”
 WASEMAVYO MASTAA KUHUSU JOHARI NA OSTAZ
Baada ya kumalizana na wawili hao, Risasi Jumamosi liliwatafuta mastaa wa filamu za Bongo ili kusikia kutoka kwao wanachokijua kuhusu Johari na Ostaz.
Mastaa waliopatikana ni watatu, lakini wote walitoa ushirikiano kwa sharti la kutoandikwa majina yao gazetini.
WA KWANZA, MWANAUME:
“Khaa! Mbona siyo siri, kwani nyie mmejua lini? Wale wako tangu zamani sana tena wengine mpaka tukadhani walishaachana, kumbe bado wapo pamoja?”
WA PILI, MWANAUME:
“Oohooo! Mlikuwa hamjui? Wale ni wapenzi. Mimi ninavyojua wana mpango wa kufunga ndoa lakini sijui ni lini na Johari atabadili dini.”
WA TATU, MWANAMKE:
“Mh! nilishasikiasikia, unajua Johari ni msiri sana, hajawahi kuweka wazi lakini ni kweli wana uhusiano wa kimapenzi.”
KAMA NI KWELI, CHEKI SINEMA YAKE
Endapo ni kweli Johari atabadili dini, ina maana atakuwa amekwenda sambamba na Ray kwani yeye anadaiwa kubadili dini kwa ajili ya kumuoa Chuchu Hans, Johari atabadili dini ili aolewe na Ost


Chanzo;Risasi

Posted By Unknown11:26

0

Continue Reading

MAJIBU/MAELEZO YA PINGAMIZI LILILOWEKWA NA BWANA FABIAN L. SKAUKI DHIDI YANGU MIMI MATAYO M.TORONGEY MGOMBEA UBUNGE JIMBO LA CHALINZE KUPITIA CHAMA CHA DEMOKRASIA NA MAENDELEO (CHADEMA)

 

 MAJIBU/MAELEZO YA PINGAMIZI LILILOWEKWA NA BWANA FABIAN L. SKAUKI DHIDI YANGU MIMI MATAYO M.TORONGEY MGOMBEA UBUNGE JIMBO LA CHALINZE KUPITIA CHAMA CHA DEMOKRASIA NA MAENDELEO (CHADEMA)

UTANGULIZI  

       Kwa mujibu wa ibara ya 67 (1) ya Katiba ya Jamhuri Muungano wa Tanzania (1977) inaeleza wazi kuwa ili mtu ateuliwe kuwa mgombea ubunge ni lazima awe na sifa zifuatazo; 

(i) Awe raia wa Tanzania (ii) Awe ametimiza umri wa miaka ishirini na moja (iii) Awe anajua kusoma na kuandika kwa Kiswahili au Kiingereza (iv) Awe ni mwanachama na ni mgombea aliyependekezwa na chama cha siasa (v) Awe hajatiwa hatiani na mahakama yoyote kwa kosa lolote la kukwepa kodi yoyote ya Serikali katika kipindi cha miaka mitano kabla ya tarehe ya Uchaguzi. 

Aidha, Kwa mujibu wa Ibara ya 67 (2) na (3) ya Katiba ya Jamhuri ya Muungano wa Tanzania 1977; hata kama mtu ana sifa zote za kugombea hataruhusiwa kugombea Ubunge kama ;

(i) Ni raia wa nchi nyingine; au (ii) Kwa mujibu wa Sheria iliyotumika katika Jamhuri ya Muungano wa Tanzania imethibitishwa rasmi kwamba mtu huyo ana ugonjwa wa akili; au (iii) Amehukumiwa na Mahakama yoyote katika Jamhuri ya Muungano na kupewa adhabu ya kifo au ya kufungwa gerezani kwa muda usiozidi miezi sita kwa kukutwa na hatia ya kosa lolote, vyovyote linavyoitwa, linaloambatana na utovu wa uaminifu; au (iv) Katika kipindi cha miaka mitano kabla ya tarehe ya Uchaguzi Mkuu amepata kuhukumiwa na kupewa adhabu ya kifungo kwa kosa linaloambatana na utovu wa uaminifu au kwa kuvunja sheria ya maadili ya viongozi wa Umma; au 

(v) Siyo mwanachama na siyo Mgombea aliyependekezwa na chama cha siasa; au (vi) Ikiwa mtu huyo ana maslahi yoyote katika mikataba na serikali ya Jamhuri ya Muungano au serikali ya mapinduzi Zanzibar wa aina yoyote aliyowekewa miiko maalumu kwa mujibu washeria iliyotungwa na Bunge, na iwapo amekiuka miiko hiyo; au (vii) Ameshika madaraka ya Afisa Mwandamizi katika utumishi wa Serikali ya Jamhuri ya Muungano, isipokuwa madaraka ambayo Rais anaweza au anatakiwa kukabidhi kwa Mbunge kwa Mujibu wa Katiba ya Jamhuri ya Muungano, au sheria iliyotungwa na Bunge; au (viii) Kwa mujibu wa sheria iliyotungwa na Bunge inayoshughulikia makosa yanayohusika na uchaguzi wa aina yoyote, mtu huyo amezuiliwa kuandikishwa kama Mpiga kura au kupiga kura katika uchaguzi wa Wabunge. (ix) Ni mgombea Urais /Umakamu wa Rais wa Jamhuri ya Muungano wa Tanzania.

    Aidha, kwa mujibu wa masharti kwa vyama vya siasa na wagombea uchaguzi wa Rais, Wabunge na Madiwani yaliyotolewa na Tume ya Taifa ya uchaguzi kifungu cha 5.3 kimeweka masharti ya Uteuzi wa Mgombea Ubunge na kuweka kama ifuatavyo;

(i) Awe amedhaminiwa na wapiga kura wasiopungua ishirini na tano waliojiandikisha kupiga kura katika Jimbo hilo. (ii) Mgombea haruhusiwi kujidhamini yeye mwenyewe (iii) Awe na dhamana ya shilingi 50,000/= (iv) Awe ametoa tamko la kisheria mbele ya hakimu kwamba anazo sifa zinazotakiwa ili kugombea Ubunge Vilevile, kwa mujibu wa masharti kwa vyama vya siasa na wagombea uchaguzi wa Rais, Wabunge na Madiwani yaliyotolewa na Tume ya Taifa ya uchaguzi kifungu cha 6.0 kimeweka utaratibu wa Pingamizi dhidi ya uteuzi wa Mgombea Ubunge: Na Kifungu cha 6.3, kimeweka sababu za kuweka Pingamizi kuwa ni: (i) Maelezo yaliyopo katika fomu ya uteuzi hayatoshi kumtambulisha Mgombea; (ii) Fomu ya Uteuzi haitimizi au haikuwasilishwa kwa mujibu wa masharti yaliyowekwa na sharia; (iii) Kutokana na maelezo yaliyoandikwa katika fomu ya uteuzi ni dhahiri kwamba Mgombea uchaguzi hana sifa zinazotakiwa; 

(iv) Uthibitisho wa Msimamizi wa Uchaguzi unaopaswa kutolewa haukutolewa; (v) Mgombea hana sifa zote zinazotakiwa; (vi) Hakuna uthibitisho kuwa Mgombea amelipa dhamana ya shilingi elfu hamsini (50,000/=); na (vii) Hakuna picha ya Mgombea. (viii) Mgombea hakujaza fomu Na.10 kuthibisha kuwa ataheshimu na kutekeleza maadili ya Uchaguzi. Baada ya utangulizi huo hapo juu ambao unaonyesha dhahiri kuwa hapakuwa na sababu yoyote ya mimi kuwekewa pingamizi na Mgombea ubunge wa Chama cha CUF, kwani hakufuata masharti ya Katiba, Sheria na maelekezo yaliyotolewa na Tume ya Taifa ya uchaguzi kwetu kama wagombea, kwani aliamua kutunga mambo ambayo yapo nje ya utaratibu na hayakidhi haja, hayakufuata Katiba, matakwa ya kisheria na hata maelekezo yaliyotolewa na Tume ya Taifa ya Uchaguzi. Nayasema yote haya kutokana na ukweli kuwa mimi nimekidhi sifa zote za kuwa Mgombea Ubunge na nimetimiza masharti yote yaliyowekwa kwa mujibu wa Katiba na Sheria za Jamhuri ya Muungano wa Tanzania. Kutokana na barua yako ya tarehe 13 Machi, 2014 yenye kumbukumbu namba HWB/E.50/21/76 nalazimika kujibu pingamizi hilo kwa mujibu wa kifungu cha sheria ya Uchaguzi sura Na.343 kifungu Na.40 (5) kuhusu pingamizi, hata kama halina nguvu kwa mujibu wa katiba, sheria na maelekezo ya Tume ya taifa ya uchaguzi hoja kwa hoja kama ifuatayvo.

MAJIBU YA HOJA ZA PINGAMIZI LA FABIAN LEONARD SKAUKI: 

1. HOJA YA KWANZA; Kwamba mimi Mathayo Mang'unda Torongey nimejaza taarifa za uongo kwenye fomu zangu kuwa kazi ninayoifanya ni BIASHARA na kusema kuwa ni taarifa za uongo kwa kuwa sikuweka vielelezo vya kuonyesha kuwa mimi ninafanya kazi hiyo, na kuwa sijulikani ninafanya kazi gani .

MAJIBU YA HOJA YA KWANZA : Pingamizi na sababu zilizotolewa na Mgombea wa chama cha wananchi CUF Bwana Fabian L.Skauki hazina mashiko na kuwa yeye ameamua kukupotosha kuwa mimi sio mfanyabiashara kwa kuwa sikuweka vielelezo, japo ni wazi kuwa sikupaswa kuweka vielelezo vyovyote kwani fomu haikuwa inanitaka kuweka vielelezo vya aina yoyote kama ambavyo hata yeye hakuweka vielelezo kuwa anafanya shughuli gani. Ninasikitika kuwa hata wewe Msimamizi umekubaliana na hoja hii dhaifu ya pingamizi na kunitaka mimi kuijibu wakati unajua wazi kuwa haina mshiko wala mantiki kwa mujibu wa sheria za uchaguzi. Naambatanisha leseni yangu ya Biashara yenye jina langu namba B.No. 01299270 iliyotolewa tarehe 19/09/2011 na huo ni uthibitisho kuwa mimi ni mfanya biashara (kielelezo A) 

2.HOJA YA PILI: Kwamba, mimi Mathayo Torongey sijui kusoma wala kuandika Kiswahili au Kiingereza, na kwamba nimedanganya na hivyo sina sifa za kuwa Mgombea Ubunge. 

MAJIBU YA HOJA YA PILI; Kwanza, nieleze wazi kuwa nimesikitishwa sana na tuhuma hizi ambazo zina lengo la kunichafua mbele ya jamii na Taifa kwa ujumla, zina lengo la kuichafua jamii ya watanzania kutoka familia za wakulima na wafugaji, watu ambao wana kipato kidogo na ambao wanaishi vijijini kuwa ni watu wa hovyo na hawajui kusoma wala kuandika, ni tuhuma za kuwadhalilisha watanzania ambao ni kutoka jamii za wananchi wa vijijini wanaotafuta fursa ya kuchaguliwa kwamba ni watu wa wanaoomba nafasi wakiwa hawajui kusoma wala kuandika, kwa kweli nasikitika sana kwa hili na lilikuwa tusi ambalo msimamizi wa uchaguzi hukupaswa kulipokea. Aidha, nashindwa kutoa ushahidi hapa kwani hata wewe umeziamini tuhuma hizi kuwa mimi sijui kusoma wala kuandika na ndio maana ukanitaka nizijibu, japo ni ukweli ulio wazi kuwa sahihi yangu kwenye fomu haikuwa ya "kuweka dole gumba" niliweka sahihi kwa kuandika na mbele yako na sikuandikiwa. Pili; Yafaa mgombea huyu pamoja na wale wote waliomtuma wakatoa ushahidi wake kwako kuwa mimi Mathayo Mang'unda Torongey sijui kusoma wala kuandika, na hii itamsaidia kuaminika mbele ya jamii ya wananchi wa Chalinze ambao anataka kuwaongoza. Hata hivyo naomba nitoe majibu mbele yako kwa maandishi na kwa kusoma kitu ambacho wewe utataka nisome na kuandika ili uwe uthibitisho kwako kuwa najua kusoma na kuandika . 

3. HOJA YA TATU: Kwamba, mimi Mathayo Torongey nimedanganya kwa kughushi/kufoji sahihi za wadhamini walionidhamini kuwa Mgombea na kuwa sahihi zote zimefojiwa na hazifanani na zile zilizokuwepo kwenye Daftari la Kudumu la Wapiga kura na kuwa sahihi zote hizi zimesainiwa na mtu mmoja ambaye sio mhusika . 

MAJIBU YA HOJA YA TATU: Kwanza, nieleze wazi kuwa nilipokamilisha kujaza fomu zangu na kudhaminiwa na wadhamini 25 kwa mujibu wa sheria , nilikuja ofisini kwako na tukakagua kwa pamoja majina ya wadhamini wote waliokuwepo kwenye fomu zangu na nilikuja na shahada zote za wapiga kura ambao walinidhamini na wewe ulizikagua na kuridhika kuwa walikuwa ni wapiga kura sahihi na saini zao zilikuwa sahihi na uliandika hilo kama uthibitisho wako kwenye fomu zangu za uteuzi na ndio maana uliniteua kuwa mgombea . Pili, Namshangaa mweka Pingamizi kwa kuja na tuhuma kuwa saini za wapiga kura zinatofautiana na saini zilizoko kwenye Daftari la kudumu la wapiga kura ,hii ni kutokana na ukweli kuwa kwenye Daftari la kudumu la wapiga kura hakuna saini za wapiga kura isipokuwa saini zipo kwenye vitambulisho vya wapiga kura, na vitambulisho hivyo niliviwasilisha kwako na wewe kama msimamizi wa uchaguzi baada ya kukagua vitambulisho hivyo uliridhika kuwa saini za wadhamini wangu zilikuwa sahihi na ndio maana uliniteua kuwa Mgombea na kuweka "uthibitisho wako" katika kifungu F. kwa maandishi kwenye fomu zangu za uteuzi. Naomba kunukuu maelezo yako uliyoyaandika kwenye fomu yangu ya uteuzi tarehe 12.03.2014 saa 9.05 Alasiri kama ifuatavyo; 

‘(i) Nimekagua majina yote ya waliomdhamini mgombea aliyetajwa hapa naninathibitisha kwamba wote wameandikishwa kuwa wapiga kura katika Daftari la kudumu la wapiga kura katika Jimbo la Chalinze' Tatu, Mweka pingamizi anatakiwa kuthibitisha kwako kuwa saini hizo zimeghushiwa kwani ni ukweli ulio wazi kuwa kwa mujibu wa sheria za nchi yetu kughushi ni kosa la Jinai na hivyo ushahidi wake huo unaweza kuwasilishwa mbele ya vyombo vya dola kwa hatua zaidi. Nne, mweka pingamizi ana wajibu wa kuthibitisha kuwa saini hizo zinafanana zote kwani ni ukweli uliowazi kuwa saini za wadhamini wangu hazifanani kutokana na kuwa wapo wadhamini ambao waliweka "dole gumba" kuthibitisha saini zao na wengine

walisaini kwa maandishi, sasa kufanana anakosema ni kwa aina gani? Kwamba alama ya dole gumba ina fanana na saini ya kuandika?! Tano, yafaa mweka pingamizi na wale wote ambao walishirikiana naye kuweka hoja hii katika pingamizi hili kujitokeza na kueleza kwa uwazi lengo la kuweka pingamizi hili ambalo ni la kutungwa na lenye nia ovu dhidi yangu, Chama changu na Wananchi wote wa Jimbo la Chalinze. 

4. HOJA YA NNE; Hoja ya mweka pingamizi iliyonihusu mimi Mgombea wa chama cha demokrasia na maendeleo (CHADEMA) ilidai kuwa nimeshindwa kutimiza mahitaji ya kisheria ya kuwa na wadhamini wasiopungua 25, badala yake nimedhaminiwa na wadhamini 28 ambao kati yao wadhamini 7 sio wapiga kura halali wa jimbo la CHALINZE, na kwamba Taarifa zao na namba zilizojazwa hazifanani. Hivyo nabakiwa na wadhamini halali 21 ambao kisheria hawatoshi kutimiza matakwa ya kisheria. Majina ya wadhamini hao ambao hawakidhi matakwa ya kisheria na namba zao kutajwa kuwa ni:- 

1. HABIBU ALLY SAIDI - 16886275 2. MOHAMMED RAMADHANI - 30376567 3. ABDULKADIR ALLY - 49264905 4. SHABANI SULEYMAN - 16984045 5. JUMA MRISHO - 48759563 6. RAJABU ALLY - 16872368 7. MANENO MIRAJI - 16872059 

MAJIBU YA HOJA YA NNE (4). Mimi Mathayo Mang'unda Torongey nimekidhi vigezo na masharti ya wadhamini wote 25 wanaotakiwa kwa mujibu wa sheria kama nilivyo orodhesha kwenye fomu ya wadhamini na hivyo basi pingamizi namba nne lililowekwa na mgombea ubunge wa chama cha The Civic United Front (CUF) Kuwa Bwana HABIBU ALLY SAIDI mwenye namba 16886275 kuwa sio mdhamini halali, nikiri kuwa ni kweli sio mdhamini wangu halali; Mdhamini wangu halali ni Bwana HABIBU ALLY DAUDI mwenye namba 16886275. Na vilevile ni kweli kwamba Bwana MOHAMMED RAMADHANI mwenye ‘30376567' si mdhamini wangu halali, Mdhamini wangu halali ni Bwana MOHAMMED RAMADHANI mwenye namba 30576567. 

Pia napenda kukuthibitishia bila chembe ya shaka kuwa Bwana ABDULKADIR ALLY mwenye namba 49264905 aliyezaliwa wilaya ya Bagamoyo tarehe 17/04/1974 ni mdhamini wangu halali aliye andikishwa tarehe 02. 03. 2010 kwenye kituo cha shule ya msingi Mkoko kata ya Msata halmashauri ya Bagamoyo mkoa wa Pwani. Hata hivyo amesema Bwana SHABANI SULEYMAN mwenye namba 16984045 si mdhamini wangu halali, Napenda kuthibitishia kuwa mdhamini wangu halali ni Bwana SHABANI SELEMANI mwenye namba 16984045 na si Bwana SHABANI SULEYMAN. Hata hivyo, nadhibitisha kuwa Bwana JUMA MRISHO mwenye namba 48759563, aliyesema sio mdhamini wangu halali ni halali kwani amezaliwa tarehe 04.04.1981 wilaya ya Bagamoyo kata ya Kiwangwa kijiji cha Msinune halmashauri ya Bagamoyo mkoa wa Pwani na shahada yake ya kupigia kura imeandikishwa kwenye kituo cha shule ya msingi Msinune, hivyo ni mdhamini wangu halali na amekidhi vigezo vya kunidhamini sawa na Bwana RAJABU ALLY mwenye namba 16872368 aliyezaliwa tarehe 28.09.1979 wilaya ya Bagamoyo kata ya Kiwangwa kijiji cha Kiwangwa mkoa wa Pwani naye ni mdhamini halali aliyejiandikisha kwenye kituo cha Kibaoni ofisini; Kama ilivyo kwa mdhamini halali Bwana MANENO MIRAJI mwenye namba 16872059 aliyezaliwa wilaya ya Bagamoyo kata ya Kiwangwa mkoa Pwani na kaandikishwa kituo cha Kibaoni Ofisini. 

Muweka pingamizi angekuwa sahihi Kama ningekuwa sijatoa uthibitisho kwa msimamizi wa uchaguzi. Hoja yake ingekuwa na uzito unao bebwa na kifungu 6.3 (iv) kwenye kitabu cha tume ya taifa ya uchaguzi cha maelekezo kwa vyama vya siasa na wagombea uchaguzi wa urais, ubunge na madiwani kinasema, "Uthibitisho wa msimamizi wa uchaguzi unaopaswa kutolewa haukutolewa". Lakini kwenye fomu namba 88 F ukurasa 8, "UTHIBITISHO WA MSIMAMIZI WA UCHAGUZI" msimamizi wa uchaguzi kwenye F( i) amekiri kukagua na kuthibitisha ya kuwa wadhamini wote walioandikishwa kuwa wapiga kura katika daftari la kudumu la wapiga kura katika jimbo la CHALINZE ni halali. 

Kwa maana hiyo, udhibitisho wa msimamizi wa uchaguzi ni kwamba wadhamini wangu ni halali hivyo hoja ya muweka pingamizi kwenye swala la wadhamini haina mashiko na msimamizi wa uchaguzi hakupaswa kupokea pingamizi hilo bali alipaswa kulitupa kabla ya kufikiria kulileta kwangu. Hata hivyo, nichukue fursa hii adhimu kumuelimisha muweka pingamizi wa chama cha wananchi CUF (Civic United Front) ya kuwa majina yanaweza kufanana kwenye kituo kimoja au kituo kingine ama kata nyingine au wilaya na mkoa mwingine lakini namba ya kadi halali ya mpiga kura haiwezi kufafana na kadi ya mpiga kura mwingine halali, kwa mfano kwenye kituo 00006347 kata ya Bwilungu jimbo la CHALINZE wilaya ya Bagamoyo Mkoa wa Pwani mpiga kura HAMZA ATHUMANI mwenye shahada namba 17023223 anafanana jina na HAMZA ATHUMANI mwenye shahada namba 1702107 sawa na Bwana BONELA SHABANI MADEGA mwenye shahada namba 19534653 na BONELA SHABANI MADEGA mwenye shahada namba 19525475. Hawa wote wakitazamwa kwa majina kwa jicho la muweka pingamizi wa CUF wataonekana ni mtu mmoja au ni mapacha wakati uhalisia ni watu tofauti wanao tofautishwa na namba za shahada zao halali za kupigia kura. 

5. HOJA YA TANO; Kuwa Mimi Mathayo Mang'unda Torongey nimedanganya Uraia wangu na kuwa mimi sio Mtanzania wa kuzaliwa kwa kuwa sikuweka vielelezo vyovyote halali. 

MAJIBU YA HOJA YA TANO; Napenda kurudia kuwa huenda mweka pingamizi ameamua kukupotosha na kuandika taarifa za uongo kwa lengo ambalo yeye na wale wote waliomtuma wanalijua wao. Napenda kurudia kuthibitisha kama nilivyoandika kwenye fomu zangu za kuomba uteuzi kuwa mimi ni mzaliwa wa Kijiji cha Kaloleni katika Wilaya ya Mvomero, Mkoa wa Morogoro nchini Tanzania . Naomba kuweka kielelezo "B" kuthibitisha uraia wangu wa Kuzaliwa kama ifuatavyo; 1. Naweka nakala ya kitambulisho changu cha kuandikishwa kuwa mpiga kura katika Jimbo la Ubungo chenye namba *46670962*. Na kwa mujibu wa sheria ya Taifa ya Uchaguzi sura ya 343 , kifungu cha 10 (1) ‘sifa na kukosa sifa za kuandikishwa kuwa mpiga kura na kupiga kura' kinasomeka ‘Hakutakuwa na mtu zaidi ya raia wa Tanzania ambaye ametimiza umri wa miaka kumi na nane na ambaye hajapoteza sifa kwa masharti ya Sheria hii au sheria nyingine yoyote ya Bunge atakayestahili kuandikishwa kuwa mpiga kura kwa mujibu wa masharti ya sheria hii' Hivyo kwa kuwa nimekidhi vigezo vya kuwa mpiga kura ,mimi ni raia halali, naambatanisha nakala ya shahada yangu ya Mpiga kura kama kielelezo ‘C'. 

Aidha, ukisoma majibu ya tume ya taifa ya uchaguzi kuhusu mapingamizi yaliyowekwa na wagombea wa CHADEMA dhidi ya uraia wa wagombea wa CCM Sioi Sumari 2012 na Godfrey Mgimwa 2014 katika majimbo ya Arumeru Mashariki na Kalenga ,Tume iliamua kuwa jukumu la kuthibisha /kutoa vielelezo kuhusu tuhuma za uraia wa mgombea ni kwa mtoa tuhuma (who allegies must prove), hivyo mweka pingamizi atakiwe kuwasilisha vielelezo vya tuhuma zake kwako ili kuthibitisha madai yake kuhusu uraia wangu. 

HITIMISHO

Baada ya maelezo tajwa hapo juu na uthibitisho ambao nimeuwasilisha kwako naomba kukujulisha kuwa mimi nina sifa zote kwa mujibu wa Katiba ya Jamhuri ya Muungano wa Tanzania kuwa mgombea halali wa ubunge jimbo la Chalinze na yafaa ukatupilia mbali pingamizi lililowekwa dhidi yangu kama jinsi ambavyo ulipaswa kulitupilia mbali kabla hujalileta kwangu kwani lilikosa sifa na vigezo vya kuwa pingamizi. 

………………………………… 

Mathayo Mang'unda Torongey 

Mgombea Ubunge wa CHADEMA jimbo la CHALINZE. 

14 Machi, 2014.

Posted By Unknown03:06

0

Continue Reading