MBUNGE WA BAHI AINGIA KATIKA KASHFA KATIKA MFUKO WA JIMBO

Mbunge wa Bahi(CCM), Omar Badwel ameingia katika kashfa baada ya Kamati ya Uhakiki wa Fedha za Mfuko wa Maendeleo ya Jimbo kubaini matumizi mabaya ya fedha hizo.

Kamati hiyo iliyoundwa na Baraza la Madiwani wa Halmashauri ya Wilaya ya Bahi, ilibaini kuwa fedha hizo zilitumika kinyume cha lengo la mfuko huo na pia taratibu za ununuzi hazikuzingatiwa.

Kuundwa kwa kamati hiyo yenye wajumbe watano, kulitokana na kuibuliwa kwa hoja ya ufisadi na Diwani wa Kata ya Lamaiti, Donald Mejitii mwishoni mwa mwaka jana.

Mejitii, ambaye pia ni Katibu Mwenezi wa CCM Mko wa Dodoma alisema fedha hizo zilitolewa kwa ajili ya ununuzi na usambazaji wa majembe ya kukokotwa na ng’ombe.

Akizungumzia tuhuma hizo, Badwel alisema inawezekana kuwa kuna tatizo katika mfuko huo lakini akadai ripoti hiyo ina ukweli na uongo pia.

“Katika ripoti hiyo, sijaona sehemu ambayo mimi nilitoa majembe kwani katika mzunguko huu na mimi nilipeleka majembe 58 kwa ajili ya wananchi wangu. Nadhani mnyonge mnyongeni lakini haki yake mpeni,” alisema.

Akisoma taarifa ya kamati hiyo katika kikao cha Baraza la Madiwani wa Halmashauri ya Bahi jana, Mwenyekiti wa kamati hiyo, Julius Chitojo ambaye pia ni Diwani wa Zanka, alisema wamebaini wananchi wamedanganywa kwa kuuziwa majembe hayo kwa madai kuwa yana chapa ya Zimbabwe.

Pia, ilibaini kuwa majembe yaliuzwa kwa wananchi kwa Sh110,000 wakati makubaliano ya Kamati ya Mfuko wa Jimbo yalikuwa ni Sh85,000.

“Pia tumebaini kuwa makusanyo ya fedha kutokana na mauzo ya majembe hayo hayajarudi halmashauri ili wananchi walio wengi waweze kunufaika na mfuko huo wa jimbo badala yake fedha hizi zimechukuliwa na Said Kayumbo kwa maelekezo kuwa anampelekea Mbunge Badwel,” alidai Chitojo.

Chitojo alisema baadhi ya wananchi wamepata mgawo wa majembe ya bure wakati wengine wameuziwa na pia fedha za vikundi ziliingizwa katika akaunti ya Jumuiya ya Akiba na Maendeleo ya Bahi (Basada) kinyume na utaratibu.

Kuhusu madai hayo Badwel alisema alitoa orodha ya vijiji ambavyo alitoa majembe yaliyotolewa kwa mfuko wa jimbo na mengine ambayo sio ya mfuko lakini hayakuainishwa katika ripoti hiyo.

“Nilipoulizwa kuhusu fedha zilizotolewa kwa vikundi nilisema fedha zote zimetolewa na zimefika katika vikundi, nashangaa hapa kwenye taarifa haijaelezwa, vitu nilivyovisema havijatolewa, vitu vimepangwa na kamati,” alisema Badwel.

Aidha, Chitojo alidai kwamba Mbunge huyo alihujumu mradi wa kusafisha kisima cha maji katika Kijiji cha Chibelela kwa kuchukua fedha za mchango kwa kazi hiyo katika kipindi cha Januari na Februari 2013 na hazikuwa zimerejeshwa mpaka kufikia Oktoba 30, 2013 wakati baraza lilipounda Kamati ya Uhakiki.

Akizungumzia madai hayo Badwel alisema alitoa Sh2 milioni kwa ajili ya mradi huo na wananchi wa Bahi walichangia Sh1.7 milioni.

“Hajiuzulu mtu hapa. Kama kuna mtu ana matarajio ya ubunge afute maana kuna watu wanaota tu ubunge, watu hawatoki hivyo. Mjinga ni kwenda tu lakini wakati wa kurudi siyo mjinga yaliyotokea ni ya kupandikizwa tu,” alisema Badwel.

Katika ripoti yake, Chitojo alipendekeza Baraza kuchukua hatua stahiki dhidi ya mbunge huyo pamoja na kumtaka kurejesha fedha zote anazodaiwa kupokea kinyume na utaratibu.

Pia kamati hiyo imeagiza kuadhibiwa kwa baadhi ya maofisa wa Basada. Chitojo alisema baadhi ya maofisa wa Basada wanatakiwa kuchukuliwa hatua za kisheria kwa kutoa risiti ambazo si za ununuzi wa majembe na pia kukopesha fedha ambazo zilikuwa zinatakiwa kuwa za ruzuku.

Baada ya kuwasilishwa ripoti hiyo, kulitokea mvutano miongoni mwa madiwani baadhi wakidai kuwa wanataka kujua kanuni na taratibu za fedha za mfuko wa jimbo na wengine walitaka ripoti hiyo ipelekwe kwa Mdhibiti na Mkaguzi Mkuu wa Hesabu za Serikali (CAG) ili uchunguzi wa kina ufanyike kuwabaini wote waliohusika na kuchukuliwa hatua.