AHUKUMIWA JELA KWA KUJISAIDIA HAJA KUBWA KISIMANI KISA!!!!

Mahakama ya Mwanzo ya Mtindiro wilayani Muheza mkoani Tanga, imemhukumu kifungo cha miaka miwili jela Victoria  Komba kwa kosa la kujisaidia ndani ya kisimani na kuchafua maji  pamoja na kuwatusi wanakijiji.

 

Hata hivyo hukumu imetolewa wakati mshitakiwa ametoroka na hajulikani alipo.

Komba mkazi wa  kijiji cha Kwabota alihukumiwa na Hakimu Mkuu Mwandamizi Kisimbo Aza na kudaiwa mahakamani hapo kuwa Januari 27 mwaka huu wanakijiji cha Kwabota  walikubaliana kuchimba kisima kutokana na shida ya maji.

 

Alisema mtuhumiwa huyo alikataa kushirikiana na wenzake  na kutamba kuwa hata kama  hakuchimba  atachota maji kwa nguvu na wakikataa atafanya jambo baya.

Alisema siku iliyofuata mfungwa huyo mtarajiwa  alikwenda kisimani akajisaidia kisha kuondoka.

 

Mahakama iliambiwa kuwa  baada ya mtuhumiwa  kwenda haja wanavijiji bila kujua walichota maji hadi yakabakia  kidogo  na walipendelea kuchota mwananchi mmoja alipandisha kinyesi cha binadamu ndani ya chombo kilichokuwa kinatumiwa.

 

Komba  alikamatwa na kufunguliwa mashtaka  mawili ya kuchafua maji na  kinyesi na kuwatukana wananchi, hata hivyo ilielezwa kuwa wakati anapelekwa rumande baada ya kukosa dhamana mshitakiwa huyo alimtoroka  mgambo wa mwanamke walipofika stendi kuu ya mabasi wilayani Muheza.

 

Walikuwa wanaelekea kwenye mahabusu gereza la Maweni mjini Tanga, hata hivyo hukumu hiyo itaanza kutekelezwa atakapokamatwa.