MNYIKA AHOFIA MAFISADI KUCHAKACHUA RASIMU

Siku moja kabla ya Bunge la Katiba kujadili rasimu ya kanuni za kuendesha  bunge hilo, mbunge wa Ubungo (Chadema), John Mnyika, ameainisha udhaifu uliomo kwenye taratibu hizo, akionya kuwa unaweza kuwapa mafisadi mwanya wa kuhujumu katiba mpya.

 

Mnyika amesema kanuni zinampa Mwenyekiti wa bunge hilo mamlaka makubwa na kumfanya aonekane kama 'mungu mtu', jambo linaloweza kutoa mwanya kwa mafisadi kuchakachua rasimu na kukiuka  maoni ya wananchi.

 

 Mbunge huyo alishauri kamati ya muda ya kanuni kuzifanyia marekebisho, lakini pia akiahidi kuwa atawasilisha hoja za kanuni zinazotakiwa kurekebishwa.

 

Akizungumza jana mjini hapa , Mnyika ambaye ni mjumbe wa bunge hilo alitaja  kanuni ya 20, fasili ya pili ya rasimu hiyo kuwa inampa mwenyekiti  mamlaka na madaraka ya kutafsiri kanuni na uamuzi anaotoa kuhusu utaratibu kuwa ni wa mwisho.

 

Kadhalika kanuni ya 44 fasili ya tisa inatoa mamlaka ya kutoa muongozo na uamuzi wake ni wa mwisho, alitaja pia kanuni ya 80 fasili ya pili kuwa inampa mwenyekiti huyo mamlaka makubwa hata  ya kuamua pendekezo lolote la kamati au mjumbe bungeni linakubalika au la na uamuzi wake ni wa mwisho.

 

 “Kanuni hizo zikipita na kukawa na mwenyekiti aliyepokea misimamo ya chama chake na maelekezo kutoka kwa mafisadi wenye malengo ya kuchakachua rasimu ya katiba kinyume cha maoni ya wananchi, basi njama zao zitafanikiwa,” alionya  Mnyika.

 

Aliongeza: “Natarajia kamati ya muda ya kanuni itavirekebisha vifungu hivyo. Iwapo havitaondolewa, najiandaa kuwasilisha hoja za kufanya mabadiliko ya kanuni zitakapojadiliwa bungeni. Nitaendelea kuchambua kanuni zote 113 fasili kwa fasili.”

 

 Rasimu ya kanuni za bunge hilo  iligawanywa kwa wajumbe  Jumatano wiki hii ili wakaisome na kuanza kuijadili kesho kabla ya kupitishwa.

 

Mwenyekiti wa muda wa bunge hilo , Pandu Ameir Kificho, aliunda kamati ya wajumbe 20 waliopewa jukumu la kumshauri na kuandika nukuu mbalimbali za majadiliano ya wajumbe na kutoa ufafanuzi wa vifungu mbalimbali.

 

Baadhi ya wajumbe hao ni  Mwanasheria Mkuu wa Serikali  Jaji Frederick Werema,  Naibu Waziri wa Katiba na Sheria, Angella Kairuki, Mbunge wa Singida Mashariki (Chadema), Tundu Lissu, Waziri wa Katiba na Sheria Zanzibar Abubakari Khamis Bakari, Othman Masoud Othman, Mgeni Hassani Juma, Ussi Jecha Simae, Ismail Jussa Ladhu na Dk. Tulia Akison.