KAFULILA AHOJI UKIMYA WA MH PINDA

Mbunge wa Jimbo la Kigoma Kusini (NCCR-Mageuzi), David Kafulila amesema sehemu kubwa ya udhaifu wa kiutendaji katika Serikali ya Jamhuri ya Muungano wa Tanzania unachangiwa na ukimya wa Waziri Mkuu, Mizengo Pinda.

 

Kafulila amesema udhaifu huo unatokana na baadhi ya watendaji wa Serikali kumdharau Pinda kwa sababu kiongozi huyo siyo mkali kwa watu wanaokwenda kinyume na maadili, miko ya uongozi, pamoja na wale wanaofanya uzembe kazini na kujihusisha na ufisadi.

Mbunge huyo ametoa kauli hiyo kwenye mikutano ya hadhara katika Vijiji vya Uvinza, Kandaga na Nguruka alipokwenda kueleza mafanikio na changamoto alizopata katika miaka mitatu ya uongozi wake.

Kauli hiyo inakuja ikiwa zimepita wiki mbili tangu Waziri Pinda alipolieleza gazeti kwamba atazungumzia shinikizo la kutakiwa kujiuzulu linalotolewa na wabunge mbalimbali, baada ya Sikukuu ya Krismasi na Mwaka Mpya.

Shinikizo la kutaka Waziri Mkuu ajiuzulu liliibuka upya baada ya kutolewa kwa ripoti ya uchunguzi wa utekelezaji wa Operesheni Tokomeza Ujangili ambayo ilisababisha Rais Jakaya Kikwete kutengua uteuzi wa mawaziri wake wanne, huku baadhi ya wabunge wakimtaka Pinda naye aachie ngazi.

Jana Mwandishi wa Habari wa Ofisi ya Waziri Mkuu, Irene Bwire alipoulizwa juu ya suala hilo alisema, “Mheshimiwa Pinda hakuwepo na amerudi jana tu (juzi), ila si aliwaahidi kuwa atazungumza baada ya sikukuu, subirini atazungumza tu.”

Katika mkutano wake wa hadhara Kafulila alisema, “Waziri Mkuu Pinda hatoshi na amepwaya, baadhi ya mawaziri wanamdharau na ndiyo maana wengi hupuuza hata kuhudhuria vikao vya Bunge. Kwa hali ilivyo sasa nchi hii inahitaji Waziri Mkuu ambaye kama mawaziri hawamheshimu, ni lazima wamuogope,” alisema Kafulila.

Alisema Waziri Mkuu amekuwa na lugha laini na isiyotisha kwa watendaji wa chini yake kiasi kwamba hakuna anayehofu hata inapotokea waziri huyo anafanya ziara mikoani kama ilivyowahi kutokea kwa baadhi ya wawaziri waliotangulia kabla yake.

“Mara nyingi utamsikia Waziri Mkuu akijibu maswali ya Wabunge kwamba; tutaangalia, bado tunatafakari, mara oooh tuvute subira kidogo, tutachukua hatua. Majibu ya namna hii kwa kiongozi mkuu wa Serikali ni hatari na yameendelea kuwapa kiburi wasaidizi wake kiasi kwamba hawahofu tena kuchukuliwa hatua za kinidhamu, hizi kauli zinaathiri ustawi na maendeleo ya wananchi” alifafanua Kafulila.

Amesema njia pekee ya kuleta nidhamu ni kuondolewa kwa Pinda Serikalini na kuteuliwa mtu mwingine atakayesimamia kwa dhati majukumu ya Serikali ikiwa ni pamoja na kudhibiti rushwa ambayo imekithiri zaidi katika Serikali za Mitaa.