JAJI MUTUNGI AKEMEA VURUGU ZA WAFUASI WA ZITTO

MSAJILI wa Vyama vya Siasa, Jaji Francis Mutungi, amekemea vurugu zilizotokea Januari 6 na 7 mwaka huu maeneo ya Mahakama Kuu Kanda ya Dar es Salaam, alizodai kufanywa na wafuasi wa Mbunge wa Kigoma Kaskazini Zitto Kabwe na wanachama wa Chama cha Demokrasia na Maendeleo (CHADEMA).

Katika taarifa yake kwa vyombo vya habari jana, Jaji Mutungi alisema vurugu hizo zilisababisha uvunjifu wa amani, hali iliyolilazimu Jeshi la Polisi kuingilia kati.

Jaji Mutungi alisema ametumia fursa hiyo ikiwa ni moja ya majukumu ya ofisi yake katika kusimamia utekelezaji wa sheria namba 5 ya vyama vya siasa ya mwaka 1992 na kanuni za maadili ya vyama vya siasa za mwaka 2007.

“Sheria hii na kanuni zake hizi inakataza vyama vya siasa kuruhusu wanachama au mashabiki wake kujihusisha na vitendo vya vurugu na uvunjifu wa amani wa aina yoyote,” ilisema taarifa ya Jaji Mutungi.

Msajili huyo aliutaka uongozi wa CHADEMA na Zitto kuwazuia wafuasi wao kufanya vurugu na kueleza kwamba mwanachama au shabiki wa chama cha siasa aelewe kuwa atawajibika yeye binafsi kwa uvunjifu wowowte wa sheria za nchi.

Aidha, Jaji Mtungu alitumia fursa hiyo kuwataka waandishi wa habari kujiepusha na ushabiki wa migogoro ya ndani ya vyama vya siasa, na badala yake watafakari kwa undani athari za taarifa zao kwa jamii kabla ya kutoa taarifa kwa wananchi.