WAHASIBU MUHIMBILI WAFIKISHWA MAHAKAMANI

Taasisi ya Kuzuia na Kupambana na Rushwa (TAKUKURU) imewafikisha mahakamani Wahasibu Wasaidizi wawili wa Hospitali ya Taifa Muhimbili kwa kosa la kuomba na kupokea rushwa ya Tshs (1,500,000/-) Milioni moja na laki tano kutoka kwa mgonjwa.

Washitakiwa hao ni Seka Ntiro (33) na Agrey Sigalla (35) ambao walisomewa mashitaka yao Jumanne tarehe 25/02/2014 mbele ya Hakimu Mkazi wa Mahakama ya Kisutu jijini Dar-es-Salaam - Waliarwande Lema.

Mwendesha mashitaka wa TAKUKURU Makao Makuu – Maghela Ndimbo alieleza mahakamani hapo kuwa washitakiwa waliomba na kupokea hongo ya Tsh 1,500,000/= kutoka kwa Magreth Mpande ili waweze kumsaidia asilipie gharama za matibabu ya marehemu mama yake wakati amelazwa katika hospitali hiyo, kinyume na Kifungu cha 15 cha Sheria ya Kuzuia na Kupambana na Rushwa Na. 11 ya Mwaka 2007.