UVCCM YAMUONYA LIPUMBA KUTOINGILIA MAAMUZI YAO.

Umoja wa Vijana wa Chama cha Mapinduzi (UVCCM) umemuonya  Mwenyekiti wa CUF Taifa Profesa Ibrahimu Lipumba kuacha kuingilia maamuzi ya kikatiba yanayofikiwa na CCM na kumtaka ashughulikie maendeleo ya chama chake.

 

Hayo yalisemwa juzi na Naibu Katibu Mkuu wa UVCCM Zanzibar Shaka Hamdu Shaka wakati akimnadi mgombea wa nafasi ya uwakilishi jimbo la Kiembesamaki Mahmoud Thabit Kombo huko Buyu Kisiwani Unguja juzi.

 

Shaka  alisema kuwa Profesa Lipumba hatakiwi kuingilia maamuzi yao na kwamba kama ameshindwa kushughulikia maendeleo ya chama chake aache siasa ama arudie kazi yake ya kushika chaki.

 

Shaka alikipuuza kitendo cha Profesa Lipumba kusema CCM  kama kina ubavu kiwafukuze wanachama wake watatu wanaotetea mfumo wa serikali tatu  akiwamo Waziri Mkuu mstaafu Dk. Salim Ahmded Salim, Joseph Warioba na mwanasiasa mkongwe Joseph Butiku.

 

“Profesa Lipumba hana haki ya kukisemea CCM na badala yake inampasa kuangalia kudorora kwa chama chake huku yeye na Katibu wake wakiendelea kuwa viongozi wa kudumu wa chama hicho kinyume na misingi ya demokrasia ya kweli,” alisema Shaka.

 

Shaka alisema  Profesa Lipumba wakati akizindua kampeni ya chama chake alikosa  ajenda na neno la kuwaeleza wananchi wa Kiembesamaki badala yake akaamua kuhoji  mfumo wa utawala na uendeshaji wa kitaasisi na kikatiba.

 

“Profesa Lipumba kama siasa imekushinda, pumzika, rudi ukashike chaki  na kufundisha  wanafunzi, mambo ya ngoswe waachie ngoswe wenyewe, usiipangie CCM la kufanya na kuamua, shughulikia udhaifu na mazonge ndani ya  CUF, CCM  mfupa mgumu uliowashinda wengi”Alisema Shaka.

 

Alisema CCM ni taasisis inayoongozwa na kuheshimu katiba yake, maadili , kanuni na nidhamu  yake na kwamba haifukuzi  wanachama au mwanachama wake  kiholela , kulazimishwa na mtu au shuruti ya kundi  lolote.

 

Akitoa mfano alisema hata mwaka 1988 CCM kwa kutambua dhamana ,kuelewa mantiki ya demokrasia na kuheshimu katiba yake,  ilimfukuza Maalim Seif Shari Hamad na wenzake sita ili kulinda heshima yake mbele ya jamii na kimataifa bila ya kutetereka na kuyumba hadi leo.

 

“CUF mlimfukuza James Mapalala,  Naila Jidawi, Salum Msabaha, Hamad Rashid, Michael Nyaruba na wengine, CCM haikuingilia uhuru wa maamuzi yenu, vipi Lipumba uweweseke unapoona CCM ikitimiza wajibu wake wa kikatiba na kimaadili” alihoji Shaka.