MADIWANI MWANZA WAWASIMAMISHA KAZI WATUMISHI SITA

Madiwani wa Halmashauri ya Jiji la Mwanza wamewamamishwa kazi kwa miezi mitatu watendaji sita wa halmashauri hiyo kwa tuhuma za ubadhilifu wa Sh. milioni 28.

 

Akisoma maamuzi yaliyofikiwa na madiwani  baada ya kujigeuza kuwa kamati, Meya wa Jiji  hilo, Stanslaus  Mabula (Mkolani-CCM),  alisema uchunguzi wa awali umebaini kwamba  watumishi sita wa  halmashauri  hiyo  wamebainika  kutumia vitabu 'feki'  na kujipatia Sh. milioni  28  ikiwa ni ushuru  wa  kuegesha kupitia  kiwanda  cha  samaki  cha TFP jijini hapa.

 

Aliwataja watendaji hao kuwa ni mhasibu, Geofrey Liana na Mary Mushi  ambaye ni mhasibu mkuu  upande  wa  mapato ya Halmashauri  ya Jiji  la  Mwanza.

 

Mabula alisema watuhumiwa hao  wamesimamishwa kwa miezi mitatu ili kupisha uchunguzi.

 

Aliwataja  wengine  kuwa ni Mhasibu mkuu  wa mapato, Labisante Meena, mtunza vitabu  vya stakabadhi za mapato, Mariam Mjema na Mhasibu mkuu wa msaidizi wa mapato, Edwine Magera ambao Mkurugenzi ameagizwa   afikishe tuhuma zao polisi kwa ajili ya hatua   zaidi za kisheria.

 

Kwa mujibu wa Meya, madiwani wamebaini  kuwa 'uchakachuaji' huo  ulifanyika  kwa nyakati tofauti kati ya Julai  na Novemba  mwaka jana.

 

Alisema kitendo hicho kilifanywa kwa kutumia stakabadhi za kitabu kilichotolewa Agosti 10, 2007 na kurejeshwa  ofisini  Februari  2,  mwaka 2010.

 

" Katika uchunguzi wetu, madiwani tumebaini  kwamba fedha hizo zilikusanywa lakini  hazikuwasilishwa katika akaunti ya Halmashauri ya Jiji la Mwanza," alisema   Mabula.

 

Alisema Mweka hazina amepewa onyo kali  kwa vile hana muda mrefu tangu  alipohamishiwa  jijini hapa.

 

Alisema kitendo kilichofanywa na watumishi  hao kimesababisha hasara na usumbufu  mkubwa kwa halmashauri.

 

Kwa upande wake, Mkurugenzi wa Jiji la Mwanza, Hilda  Halifa,  aliwapongeza madiwani kwa kuchukua hatua dhidi ya  watendaji wasiokuwa waadilifu kazini.

 

Aliahidi kuwa ofisi yake itaendelea kutoa  ushirikiano kwa madiwani pamoja na vyombo