WATUHUMIWA WA KESI YA DK MVUNGI WAHOFIA KUUANA SEGEREA

Washtakiwa wanaokabiliwa na kesi ya mauaji ya kukusudia ya aliyekuwa Mjumbe wa Tume ya Mabadiliko ya Katiba, Dk Sengondo Mvungi wameiomba Mahakama ya Hakimu Mkazi Kisutu iwaweke kwenye magereza tofauti ili wasije wakauana kwenye Gereza la Segerea.

Washtakiwa wanaokabiliwa na kesi hiyo wanatokea Dar es Salaam ambao ni Chibago Magozi (32), Juma Kangungu (29), Msungwa Matonya (30) na Mianda Mlewa (40) wote wakazi wa Vingunguti, Dar es Salaam na John Mayunga (56) mkazi wa Kiwalani.

Wengine ni aliyekuwa mlinzi wa marehemu Dk Mvungi, Longishu Losingo (29), dereva na mkazi wa Kitunda, Masunga Makenza (40), mkazi wa Tabata Darajani, Paulo Mdonondo (30), mkazi wa Buguruni, Zacharia Msese (33) na mkazi wa Mwananyamala, Ahmad Kitabu (30).

Ombi hilo, lilitolewa jana na Losingo mbele ya Hakimu Mkazi, Sundi Fimbo muda mfupi baada ya Wakili wa Serikali, Yasinta Peter kuiambia mahakama kuwa upelelezi wa kesi hiyo bado haujakamilika na kuiomba ipange tarehe ya kuitaja.

Baada ya maelezo hayo, Hakimu Fimbo aliiahirisha kesi hiyo hadi Desemba 19, mwaka huu kwa ajili ya kutajwa ndipo Losingo aliponyoosha mkono na kuieleza mahakama kuwa wanagombana na kutishiana kuuana wenyewe kwa wenyewe kila siku gerezani.

“Mheshimiwa, sisi wenyewe kwa wenyewe tunatishiana kuuana, tunagombana kila siku gerezani tutauana tunaomba tusambaratishwe, magereza yapo mengi mheshimiwa, tutauana sababu kila mtu anamtuhumu mwenzie kuwa ndiye aliyetoa taarifa ahusishwe kwenye tukio hili kwa simu,” alisema Losingo.

Mshtakiwa mwingine, Masunga Makenza aliunga mkono hoja hiyo na kuongeza kuwa wingu la ugomvi ndani ya Gereza la Segerea miongoni mwao linarindima kila siku, “Tunaomba tusambaratishwe kila mmoja kwenye gereza lake.”

Wakati Losingo na Makenza wakieleza hayo, washtakiwa wenzao nao walinyoosha mikono na wakitaka kusema jambo. Hata hivyo, Hakimu Fimbo hakuwapa nafasi na kuwaambia: “Kwa sasa hakuna magereza ya kutosha ya kuwatawanya, mkae hukohuko Segerea, muelewane na likapotokea lolote muutaarifu uongozi wa gereza.”

Awali, akiwasomea mashtaka yao, Wakili wa Serikali, Aida Kisumo alidai kuwa, Novemba 3, mwaka huu washtakiwa hao kwa pamoja walifanya kosa hilo la mauaji ya Dk Mvungi kinyume na kifungu cha 196 cha Sheria na Kanuni ya Adhabu sura ya 16 iliyofanyiwa marekebisho mwaka 2002.