MWIGULU AKIMBILIA KWA TB JOSHUA KUFANYA TOBA

NAIBU Waziri wa Fedha na Uchumi (Sera), Mwingulu Lameck Nchemba, amekimbilia kwa Mchungaji maarufu duniani, TB Joshua, wa nchini Nigeria, kufanya toba, kuombewa na kupata kile kinachoaminika kuwa ni utakaso.

 

Mwingulu ambaye pia ni Mbunge wa Iramba Magharibi (CCM), anaongeza idadi ya wanasiasa nchini wanaokimbilia kwa TB Joshua kuombewa, kufanya toba na kupata utakaso unaoaminika kwamba unaweza kuwasaidia katika harakati zao za kisiasa.

Mmoja wa wanasiasa waliopata kufika kwa mchungaji huyo nchini Nigeria na kuibua mjadala nchini ni pamoja na Waziri Mkuu wa zamani, Edward Lowassa, Mbunge wa Monduli (CCM).

Akiwa kanisani hapo juzi, huku akionekana moja kwa moja na Kituo cha Televisheni cha Emmanuel, Mwigulu akiwa amevalia skafu shingoni kama kawaida yake,  aliinuliwa na TB Joshua na kujitambulisha kwa majina yake matatu kwamba anaitwa Mwigulu Lameck Nchemba.

Kabla ya kumuinua Mwigulu, Nabii Joshua alikuwa akizungumzia namna ya kumuita Yesu Kristo. Aliwaambia waumini wake waliofurika katika kanisa hilo maarufu duniani kuwa jina la Yesu linaitwa mara moja na anasikia na kutenda kazi mara moja, lakini ukiona unamwita Yesu mara nyingi bila kukuitikia, ujue huyo si Yesu Kristo Mnazareth.

Wakati akisema maneno hayo, Mchungaji Joshua alisogea hadi mahala alipokuwa ameketi Mwigulu na waumini wengine na kumtaka asimame, huku akiwaomba waumini waangalie mfano aliokuwa akiutoa kwa Naibu Waziri huyo wa Fedha.

Mazungumzo kati ya Mwingulu na Mchungaji Joshua yalikuwa hivi:

TB Joshua: Wewe Bwana unaitwa nani

Mwigulu: Naitwa Mwingulu

TB Joshua: Taja majina yako matatu

Mwingulu: Naitwa Mwigulu Lameck Nchemba

Baada ya utambulisho huo, TB Joshua alijaribu kuyaita majina yote matatu ya Mwigulu, lakini alishindwa kwa kutamka vibaya na baadaye akamtaka Mwigulu amwite Mchungaji Joshua kwa jina lake.

Kabla ya Mwigulu hajaanza kumwita, Mchungaji Joshua alisogea hatua takriban kumi mbele ya Mwigulu, akiwa amempa mgongo Mwigulu na kumtaka amuite kwa jina lake.

Mwigulu alianza kumuita TB Joshua zaidi ya mara saba, lakini Naibu Waziri huyo hakugeuka nyuma wala kuitikia na ndipo alipowarejea waumini wake kwa kusema ukiona unaita jina la Yesu mara nyingi bila kuitikiwa, ujue unayemuita si Yesu.

Katika ibada hiyo, TB Joshua pia alisema Tanzania, Nigeria na nchi nyingine zinazokabiliwa na uchaguzi mkuu hivi karibuni zitakumbwa na matatizo makubwa ya hekaheka za uchaguzi, lakini aliwaonya viongozi watakaohusika na uvunjifu wa amani, hawataachwa salama na mkono wa Mungu.

Gazeti hili halikuweza kumpata Mwigulu kueleza kwa undani kilichompeleka nchini Nigeria katika kipindi hiki, lakini wadadisi wa mambo ya siasa  wanasema kuwa ziara ya Mwigulu kwa Mchungaji Joshua, huenda na bila shaka ina nia ya kufanya toba kwa yote aliyoyafanya  dhidi ya viongozi wa CHADEMA kwa malengo ya kisiasa.

Lakini pia huenda alikuwa na lengo la kutoa asante kwa kuteuliwa kuwa Naibu Waziri wa Fedha na Uchumi, hivyo kuondokana na siasa za kushambuliana moja kwa moja na wapinzani kama alivyokuwa akifanya kwenye nafasi yake ya awali.

Mwigulu aliyetamba kuhusika katika mkakati wa uzushi kwamba viongozi wa Chama cha Demokrasia na Maendeleo (CHADEMA), walipanga njama za kutaka kumteka Naibu Mhariri Mtendaji wa Mwananchi Communications, Denis Msaky, alionekana ‘live’ kwenye ibada ya juzi Jumapili mbele ya TB Joshua na kuonyeshwa moja kwa moja na Kituo cha Emmanuel TV cha nchini Nigeria.

Katika sakata hilo lililoonekana kama sinema na ambalo hadi sasa bado liko mahakamani, Mwigulu alisababisha Mkurugenzi wa Ulinzi na Usalama, Wilfred Lwakatare na Ludovick Joseph wakamatwe na kufunguliwa mashitaka ya kula njama za kutaka kumuua Msaky, lakini baadaye waliachiwa kisha kukamatwa tena na kusota kwa muda mrefu rumande bila dhamana. Hata hivyo watuhumiwa hao sasa wako nje kwa dhamana.

Lengo la mkakati huo haramu wa Mwigulu unadaiwa  ni kutaka kuiaminisha jamii kwamba CHADEMA ni chama cha vurugu, kinachosababisha mauaji ili wananchi wasikiamini kushika dola.

Ndani ya Bunge la Muungano, Mwigulu ambaye amepata kuwa Naibu Katibu Mkuu wa CCM (Bara), alikuwa kinara wa kuibua hoja za uzushi na uongo dhidi ya viongozi wa CHADEMA, hususan Mwenyekiti wa CHADEMA, Freeman Mbowe.

Mwaka juzi Lowassa, mwanasiasa anayetajwa ‘kujipanga kugombea urais mwaka 2015,’ alitinga nchini Nigeria kufanya maombi kwa Mchungaji Joshua, ambaye alimtabiria ushindi unaoelezwa kuwa ni wa urais.

Ziara ya Lowassa kwa TB Joshua ilielezewa kama ‘kukata rufaa kwa nabii, kutafuta utakaso kisiasa, kupata nguvu na ujasiri’ kabla ya kuingia katika kinyang’anyiro cha nafasi ya juu ya kisiasa nchini.

Misa ya Nabii Joshua ilionyeshwa katika Emmanuel TV ya Nigeria, ambayo inaonekana duniani kote, Lowassa alionekana akiwa katika jumba la maombi la Nabii Joshua.